සඳ සාවියේ

මේ තරම් කලින්
බැස යන බව
දැන සිටියා නම්
මට අහස දිහාවත්
නො බලා
ඉන්නට තිබුණා
ඔබ ඇවිත් සඳ
දියෙන් තෙමා
මා අවදි කළේ
ඇයි සඳ සාවී
මේ රාත්‍රිය
තව ම තරුණ යි
ඔබ නැත අහසේ

නිල් තාරකා තුරුළු වී ඉඟි කළත් සිනා සී
ඔබෙ සුවඳට ම ඇදෙන්නේ හිත ඇයි සඳ සාවී
මේ හිතට කුමක් සිදු වුණා ද මම වත් නො දනිම්
එය ඔබ කෙලෙස සිතා ගන්න ද සාවී
ඔබ ඇවිත් සඳ දියෙන් තෙමා
මා අවදි කළේ ඇයි සඳ සාවී
මේ රාත්‍රිය දිගු යි වෙහෙස යි - ඔබ නැත අහසේ

ඔබ අයිති අහසට යි මම මහ පොළවට යි කියා
දැන සිටියා අප දෙදෙන ම ඒ නො වේ ද සාවී
මේ සුවඳ ඔබ තබා ගිය මම වාවනු කෙ ලෙස ද
ඇයි එය අරන් යන්න අමතක වූ යේ
ඔබ ඇවිත් සඳ දියෙන් තෙමා
මා අවදි කළේ ඇයි සඳ සාවී
මේ රාත්‍රිය කෙ සේ ගෙවමි ද - ඔබ නැත අහසේ

වෙන්වීම

සැඟවුණා නුඹෙ
සුවඳ සුසුමක සැඟවුණා
කඳුලු සීතල මැදින් දෙකොපුල
පුරුදු උණුසුම තැවරුණා

තනි වුණා ගං දෑල
දෙවුරක තනි වුණා
ගිලිහුණා පියසලනු බැරි වී
අත්තටු ද ගිලිහුණා

ගිලිහුණා නොපිපීම
නටුවෙන් ගිලිහුණා
ගොලු වුණා ගී ගයනු බැරි වී
තුඬ තුඬ ම ගොලු වුණා

වලාකුලු පවුර

වලාකුලු පවුර මත හිඳගෙන
මම - මගේ කඳුලු දෝතට අරගෙන
සුසුමක සඟවා පා කර යවමී
මටම නොපෙනෙන අනන්තයකට

නිම් වළල්ලේ ඈත හිනැහෙන
නිවුණු තරු එලියක්
සෙනෙහසේ සිහිල තවරා
පිරිමදී මතකයේ නළලත

නෙතු පියල්ලෙන් පරව ගිලිහුණ
වේදනා බිඳුවක්
තනි රකී තනිව හිඳගෙන
ගිලන් වූ සිහිනයේ දොරකඩ

සත්සර මුසුව - වින්දක වීරසිංහ
කටහඬ - චාන්දනී සෙනෙවිරත්න

හිතුවක්කාර කිරිල්ලී

හිතුවක්කාර කිරිල්ලී
නුඹට යන්නම ඕනෑ නම්
කැදැල්ලේ දොර විවර කරන්නම්
ඉතින් යන්න ඉගිල්ලී

මේ විසල් අහස - මනමාල සිනා පා
තරු ඇසක් ඉඟිමරා බලා හිඳී
නිදහසේ සිහිනයේ තුරුලු වෙමින්
ඉතින් යන්න ඉගිල්ලී

හී සරින් රුදුරු - හද බිඳී පෙර එදා
මඟ සොයා පලා ආ කැදැල්ලේ
නුහුරු නම් පුරුදු ඒ උණුසුම දැන්
ඉතින් යන්න ඉගිල්ලී

සත්සර මුසුව - ස්ටැන්ලි පීරිස්
කටහඬ - ආසිරි ප‍්‍රියන්ත මුම්මුල්ලගේ

ගීතය අහන්න

අවසර නැති බිම

පි. අවසර නැති බිම වැට මායිම් පැන ඇයි
හොරෙන් හොරෙන් ආයේ
මේ කඳුලු මටම තිබුනාදෙන්
පිට වී යනු මැන පින්කාරී

ගැ. අවසර මොකටද මට මලක් සිඹින්නට
විකසිත මල් යායේ
නොකියාම ඉතින් මල් සුවඳට හිමිකම්
සිඹිනෙමි මල මාගේ

පි. කඳු කොපුල සිඹී සඳ අසල නිදා හුන්
තනි තරුවට රහසේ

ගැ. නොපතාම ඉතින් සඳ එලියට හිමිකම්
කිමිදෙමි සඳ පානේ

පි. කිරි සුවඳ ගලයි අර කැදැලි තුළින් එයි
නැලවිලි ගී රාවේ

ගැ. නොකියාම ඉතින් රන් ස්වරයට හිමිකම්
මුමුණමි ගී තාලේ

මගෙ සිංහ සීවලී

මගෙ සිංහ සීවලී
තුංග චණ්ඩ මිඟිදා මේ වන ගැබ
වීර්යවන්ත එකසර කෙසරා මම
මා පි‍්‍රය දියණියනේ - මොළකැටි දියණියනේ

මේ රුදු වනගැබ මාර සෙනඟ හා
සටන් වැදී හද පිපිරී
හැන්දෑ කලුවර ගුලි කරගෙන හිත
පියවර මැන එමි දුකසේ
මළපුඬු විසකුරු හලාහලින් පිරි
මහ වනයම අමතක වී
ලෙන් දොරකඩ පිපි නුඹේ සිනා වත
රිදී පහන් වැට දැල්වේ

සිත පිරිමැද දුක නිවන කතාවක
සඳුන් සිහිල මැද දැවටී
මහ වන මැද දුක් කරදර පිරිපත

හිරු දුටු පිණිසේ වියැකේ 
දවසක ලෙන තුළ මා තනිකර නුඹ
සැඟවී යන බව නොදැනී
තුංග චණ්ඩ මිඟිදා නුඹ අබියස
මුව පොව්වකු වී හිනැහේ